今朝收到姨媽傢俬的電郵，發現跟家裡其他衣櫃同一系列的三桶櫃做特價。這個高度正正到腰，而且面頭剛剛好容得下一張standard size的changing pad，立即去搶購好了！
本來是打算等唐生放工才去的，不過根據過往經驗，如此荀價應該好快斷貨，而且減價尋日就已經開始，所以還是趁空檔時間自己去。去到已經沒有白色嚕（本打算買個白色容易襯BB房的其他傢俬嘛），就買了個跟家裡其他衣櫃一樣的black brown，那就算將來BB不合用也可以搬到我房嘛！
連推貨的車仔也被掃清光，點算好呢？那盒櫃已經在我手，就是沒辦法送到收銀處。超無助的我，好想打電話求救，可是又唔知有誰能夠救到我。
此時有個好心人見我狼狽非常，便着我將盒櫃搬上佢架車仔。這個時候也無謂逞強啦，唯有話佢知我粗身大勢實在搬唔郁！於是那位好心小姐幫我搬上車仔之餘，更幫我搬埋上車尾廂！
謝謝好心人！第時BB換片也會記得你！
4 comments:
一個大肚婆自己去姨媽傢俬。真係服左你﹗﹗﹗
記住綁實個changing pad落個櫃上面窩~~ 唔係會左搖右擺﹐唔安全架﹗
同埋初頭用呢﹐因為一日換成十幾廿條﹐可以打橫黎用 (or 你個人係櫃邊企﹐睇你點擺放喇﹗) 甘樣會就手好多的。
另我家的(藍色)diaper champ已經無用喇﹐不過有破損﹐你考慮下要唔要接收丫~~ 同埋張BB床已經係我屋企隨時可送貨喇﹗
我係博會有好心職員幫我手0架嘛！點知我個肚唔夠揚，無乜人睇得岀（定係當睇唔到呢？？）。
真係要快0的買埋個changing pad番0黎研究吓點綁點用先又安全又就手喎，咪到時拿手唔成勢就弊啦！
連Diaper Champ都有得過戶呀！！破損都唔緊要，我最主要係需要一個有蓋container裝埋一次過拎岀去“隧道”，而家屋企0的垃圾桶全部都無蓋0架！
好，等我拿拿臨清空間BB房接收張床仔先！Thank you Thank you!!!
突然細到好似唔見左個肚﹐確實好難發覺嘅.... 經驗話我知女人係會比較sensitive的﹐所以要博有人幫手﹐向女性埋手﹗
應該可以係後面個塊板頂整個窿塞changing pad附有條帶過去﹐另外一面係第一個櫃桶攝入去click埋個墊就唔郁架喇﹗ 再‘穩鎮'd可以係櫃面加’防滑貼‘(IKEA兒童部有售)就更穩喇﹗ 到我地食lunch時再分享下個人放BB野心得﹐當聽下故仔囉﹐唔洗盡信 : )
慢慢但丫唐生執喇﹗ 不過佢見你都未見肚應該都無乜動力幫你手﹐ 哈~~~ 下次突發需要人陪你去shopping/食野之類可以試下打比我呢個閒人咯﹗
好呀好呀！聽0的update個案總好過聽我0的同事／某人講0的廿幾卅年前0既揍仔經（到目前仍然有人因為聽到我打算全母乳而覺得驚訝！！）。
係喎！下次可以搵吓你喎！
Post a Comment