師奶仔看「洗腦」

不時會聽到「一個學科可以有幾洗腦」的疑問，容我舉個實例簡單引證。

（此乃真人真事）
爸爸：爸爸靚仔定林峯靚仔呀？
悠悠：爸爸。
爸爸：爸爸靚仔定劉華靚仔呀？
悠悠：爸爸。……邊個係劉華？

「爸爸靚仔」乃悠悠接觸到的千言萬語中最不被認同的statement，教材是爸爸編的，中心思想肯定有偏頗。除了爸爸之外，其他人已不斷在她面前否定她對「靚仔」的理解。沒錯，靚仔與否，見仁見智。但因為爸爸隨便講過，她信了，「爸爸靚仔」對她來說就是事實，而且深深植入腦袋中。以後見到爸爸般面口的人，才算靚仔！要改變她的想法，不容易。正如國民教育，灌輸的是一套思想，不像數學科學般靠驗證，更沒有標準去量度，只有信與不信。

不過是閒話半句，就足以影響一個兩歲半小朋友的想法。要是從小一到中六，日復日年復年的不斷灌輸某種思想，姑勿論是對是錯，都已經混淆了學生的視聽，影響了他們的判斷力。