關於奶

工作關係，會接觸到好多育兒專家。

最近一個project上，跟Public Health Nurse、母乳顧問聊起餵奶的事。我話我都仲餵緊，只是覺得唔夠比佢食，所以都會補配方奶或鮮奶。同事話，其實夠唔夠食自己唔會知，通常自己覺得無乜幾多，但寶寶是吸到好多的。而且一歲以上的寶寶主要靠固體食物吸收營養，母乳主要是維繫親密關係、安撫寶寶，而最重要的是持續給予抗體，這是任何食物都沒有的，餵得越耐，將來越會見到成果，尤其是返學後，就算惹了傷風感冒，都會好快好番喎！

又講到開奶粉的正確方法，因為奶粉不是全無菌，所以應該先用滾水開才能殺菌，之後用凍水座暖到適當溫度。可是等座凍有排等，所以我是先用少量滾水開溶奶粉，再加凍滾水，溫度就剛剛好，可以即開即食啦！而家因為開始加入鮮奶仲方便，先用適量滾水開兩安奶粉，再加鮮奶就搞掂！

同事問點解悠悠飲得鮮奶我仲比奶粉，我話而家只係清緊手頭上的sample，清晒就轉全鮮奶啦！佢話小B奶粉同大B奶粉裡面，寶寶吸收到的營養其實無分別，只是因為世衛禁止初生嬰兒奶粉賣廣告，所以奶粉商才研發出6個月以上、一歲以上大B奶粉，用來賣品牌廣告而已，目的是令家長覺得6個月以上的寶寶需要不同的營養，母乳未必比到！有些更會在包裝上寫適合1－3歲寶寶，誤導家長覺得應該要幫襯佢到3歲！事實上，一歲以上寶寶靠奶類吸收的主要是鈣，其餘的應該可以從日常飲食吸收到。既然可以從鮮奶、乳酪、芝士等吸收到鈣，為何還要讓他吃罐頭奶？大人都唔會日日食罐頭吧？！

至於幾時同悠悠斷奶，我覺得既然自己選擇了這個天然的方法，就讓他自然結束吧！同事話，母乳寶寶有自己的schedule，有人餵到兩歲、三歲、四歲，星加坡更有餵到11歲的案例。有一天她不再需要時，就會自己wean off，如非必要，無須特別去戒的！